Сіз Қонаев қаласындағы ойын аймағына шетелдік туристер неге бармайтыны туралы ойланып көрдіңіз бе? Алғашқы ой — шетелде қызмет көрсету деңгейі әлдеқайда жоғары деген пікір. Алайда шын мәнінде мәселе бұдан әлдеқайда терең. Осы сұраққа «QAPINFO» ақпарат агенттігінің журналисі жауап іздеп көрді.

Қонаевқа шетелдік ойын-сауық туристерін тарту үшін ойын мекемелері жарнамаға тұрақты түрде үлкен қаржы жұмсауы тиіс. Өкінішке қарай, мұндай көлемдегі қаржы олардың қолында жоқ.

Ойын мекемелері өкілдерінің айтуынша, Қазақстанда бұл бизнесті мемлекеттік қолдаусыз жүргізу және дамыту қиын. 2017 жылы бюджетке төленетін салық көлемі екі есеге артқаннан кейін, басқа да шығындар көбейіп, көп жағдайда табыстан асып түсуде. Мысалы, ойын орындарының ғимараттарын күтіп ұстауға кететін шығындар едәуір өсті, өйткені олар жоғары талаптарға сай болуы тиіс. Қызметкерлердің еңбекақысына жұмсалатын шығындар артты, ілеспе қызметтердің құны қымбаттады, автопаркті ұстау шығындары көбейді, сондай-ақ мейрамханалар үшін сатып алынатын азық-түлік бағасы айтарлықтай өсті.

Шығындардың тұрақты түрде өсуінен бөлек, форс-мажор жағдайлар да кездеседі. Кей кездері мекеме уақытша тоқтап, мүлде табыс әкелмейді. Мысалы, электр энергиясы, су, кәріз жүйелеріне байланысты апаттар орын алуы мүмкін. Бұған қоса жоспарлы жөндеу жұмыстары кезінде де қызмет тоқтатылады.

Бұл – еліміздегі ойын орындарының шетелдік туристерді тартуда қиындық көруінің барлық себептері емес.

Қазақстанда туризмді дамытуға жауапты тұлғалар бұл саланың да экономиканың бір бөлігі екенін түсінеді деген үміт бар. Өйткені ойын бизнесі салық түсімдерін қалыптастырады, инвестиция тартады және мемлекеттік қолдауды қажет етеді. Сондай-ақ ойын бизнесі қауымдастығымен бірлесіп, осы секторға шетелдік туристерді тартуға бағытталған нақты бағдарламалар әзірленіп, жүзеге асырылады деген сенім бар.