Тайландта казиноны заңдастыру — экономиканы жандандыратын жаңа қадам

Тайланд үкіметі елдегі ойын бизнесін реттеу бағытында маңызды шешім қабылдап, казино мен құмар ойындарын заңдастыру туралы заң жобасын бекітті. Бұл бастама туризм саласын күшейтіп, жаңа жұмыс орындарын құруға және ел экономикасына ірі инвестициялар тартуға бағытталған.

Премьер-министр Паетонгтарн Чинаваттың айтуынша, казиноны заңдастыру арқылы мемлекет құмар ойындарын толық бақылауға алып, көлеңкелі айналымды азайтып, бюджет түсімдерін айтарлықтай арттыра алады.

«Бұл шешім қоғамды қорғап қана қоймайды, сонымен бірге мемлекеттік кірісті көбейтуге мүмкіндік береді», – деді ол.

Заң жобасында мемлекеттік бақылаумен жұмыс істейтін ірі ойын-сауық кешендерін ашу көзделген. Мұндай орталықтар ойыншылар үшін қауіпсіз орта қалыптастырып қана қоймай, Тайландтың туризм саласындағы бәсекеге қабілеттілігін арттырады. Өйткені Камбоджа, Сингапур, Филиппин, Лаос және Мьянма сияқты көрші елдерде казино индустриясы әлдеқашан туризмнің ажырамас бөлігіне айналып, жыл сайын миллиардтаған доллар табыс әкеліп отыр.

Тайландтың қаржы вице-министрі Джулапан Аморнвиваттың айтуынша, бұл бастама шетелдік туристер ағымын 5–10 пайызға дейін арттырып, туризмнен түсетін кірісті 120–220 миллиард батқа көбейтуі мүмкін. Оған қоса, 9–15 мың жаңа жұмыс орны ашылады деп күтілуде.

Тайландтағы бұл өзгеріс Қазақстандағы жағдайға да назар аудартты. Қазір Қазақстанда бар болғаны алты казино мен үш ойын автоматы залы заңды түрде жұмыс істейді. Олар толықтай заңмен реттеледі. Алайда елімізде ойын бизнесі бюджет кірісін ұлғайту немесе турист тарту құралы ретінде қарастырылмайды.

Дегенмен, сарапшылардың пікірінше, Қазақстанда казино индустриясын дамыту айтарлықтай экономикалық пайда әкелуі мүмкін. Біріншіден, бұл жаңа ойын-сауық кешендерін салуға мүдделі инвесторларды тартар еді. Екіншіден, көлеңкелі құмар ойындар нарығын заңдастыру арқылы салық түсімдерін арттыруға болады.