Семейде штабтың топографиялық қызметінің басшысы, капитан дәрежесіндегі офицерді, әскери сот мүлікті ысырап еткені үшін соттады. Ол букмекерлік кеңседе ұтыс тігуден туындаған қарыздарын өтеу үшін, әскери бөлімге тиесілі топографиялық құралдарды ломбардқа өткізген.

Семей гарнизонының әскери соты, капитанға мүлікті ысырап еткені үшін кінәлі деп үкім шығарды. Әскери қызметші, өзінің қызметтік жағдайын пайдаланып, ломбардқа әскери бөлімге тиесілі топографиялық құралдарды салған. Тергеу келтірілген шығын көлемі 2 млн теңгеден астам екенін анықтады. Сот капитанды әскери атағынан айыра отырып, екі жыл алты айға бас бостандығынан айырды. Сондай-ақ сотталушыдан материалдық шығын және мемлекеттік баж өндірілді.

Бұл жағдай Интернетте қол жетімді құмар ойындардың өсіп келе жатқан мәселесін көрсетеді. Мұндай қызметтердің тәуліктің кез-келген уақытында қолжетімді болуы, құмар ойындарға бейім адамдарға ерекше қауіп төндіреді. Осындай сайттарға кәмелетке толмағандардың кіруі мүмкін екендігі алаңдатады, бұл ауыр әлеуметтік және психологиялық зардаптарға әкелуі ықтимал.

Естеріңізге сала кетейік, жақында Қазақстан Президенті Қасым-Жомарт Тоқаев мемлекеттік қызметшілерге, әскери және борышкерлер тізіміне енгендерге құмар ойындарға қатысуға тыйым салатын, құмарпаздыққа қарсы күрес туралы Заңға қол қойды. Тәртіп бұзушылар атқаратын лауазымдарынан босатылады. Кейбір мәліметтер бойынша, жаңа заң 280 мыңға жуық шенеунікке, әскери және бюджеттік ұйымдардың басшыларына қатысты болады.

Онлайн-ставкаларды жүзеге асыратын букмекерлік кеңселердің қызметіне бақылауды күшейту қажеттілігі айқындала түсуде. Қазақстанда тыйым салынған виртуалды немесе интернетте қызмет көрсететін онлайн-казиноларды тезірек бұғаттау, азаматтарды құмар ойындардың зиянды әсерінен қорғауға және болашақта осындай оқиғалардың алдын алуға көмектеседі.