Қазақстанда алаяқтар Қонаев қаласында орналасқан «Bellagio» және «Bombay» казиноларының онлайн-нұсқалары ашылады деген жалған ақпарат таратуды жалғастыруда. Интернет-алаяқтар ойыншыларды алдап, назарын аударту үшін танымал казино брендтерін пайдаланып отыр.

«Bombay» ресми жер үсті казиносының өкілдері интернетте таралған бірнеше жалған хабарландыруларды анықтағандарын мәлімдеді. Онда белгісіз тұлғалар «Bombay» казиносының атауы мен бейнесін заңсыз қолдана отырып, онлайн-казиноның жарнамасын орналастырған. Алайда шын мәнінде, ресми «Bombay» казиносының онлайн ойнауға арналған ешқандай платформасы жоқ, және интернеттегі мұндай ақпараттың барлығы — жалған.

Осы факті бойынша «Bombay» казиносының өкілдері алаяқтық әрекеттерді тоқтату үшін құзырлы органдарға жүгінді. Сонымен қатар, олар Қазақстан Республикасында онлайн-казино ұйымдастырудың заң бойынша қатаң тыйым салынғанын еске салды.

Қонаев қаласының полициясы да түсінік беріп, мұндай алаяқтық схемалар жаңа құбылыс емес екенін және интернеттің түрлі сегменттерінде үнемі пайда болып отыратынын айтты. Сондай-ақ полицейлер азаматтарды сақ болуға және әсіресе шындықтан тым жақсы көрінетін ұсыныстарға тап болған жағдайда, ақпараттың дұрыстығын міндетті түрде тексеруге шақырды.